» Celfyddydau Perfformio «

Mae’r Celfyddydau Perfformio yn ymwneud â chefnogi sector celfyddydau awyr agored Cymru ac yn defnyddio cyrhaeddiad rhyngwladol y Dyn Gwyrdd fel sbardun i artistiaid ddatblygu cynulleidfaoedd newydd a rhoi cynnig ar syniadau newydd, gyda chefnogaeth arbenigedd technegol a chynhyrchu helaeth tîm Gŵyl y Dyn Gwyrdd. Bellach mae'n un o'r dyddiadau allweddol yng nghalendr teithiol cenedlaethol yr Haf. Gyda strategaeth ryngwladol yn cael ei datblygu, rydym yn cysylltu artistiaid o Gymru â marchnadoedd newydd ar gyfer teithio a chyflwyno gwaith rhyngwladol na welwyd mo’i debyg yng Nghymru o'r blaen.

Rydym yn cynnig comisiynau, gofod arbrofi ar gyfer syniadau newydd a chefnogaeth ymarferol, ac rydym yn cefnogi popeth - o gwmnïau syrcas sy'n dod i'r amlwg i enwau adnabyddus fel Theatr Genedlaethol Cymru, Ballet Cymru a Theatr Hijinx wrth iddynt arbrofi gyda ffurf a chyrhaeddiad. Rydym yn hyrwyddo uchelgais, ansawdd cynhyrchu a risg greadigol.

Drwy gynnal perthynas hirdymor gydag artistiaid rydym yn cynnig:

• Cymorth technegol arbenigol a mynediad i seilwaith cynhyrchu

• Cyfleoedd mentora a dysgu gan gymheiriaid

• Cyllideb, lleoliad a chyrhaeddiad sylweddol at gynulleidfaoedd

• Rhwydwaith gyfnewid ryngwladol

• Gweithdy a thrafodaeth panel a arweinir gan artistiaid

Yn 2022, fe wnaethom lansio Rhaglen Gyfnewid Fyd-eang y Dyn Gwyrdd i fanteisio ar gyrhaeddiad rhyngwladol ac enw da'r ŵyl i:

• Hyrwyddo artistiaid a diwylliant Cymru yn fyd-eang

• Sefydlu partneriaethau cyd-gomisiynu a theithio ar gyfer artistiaid o Gymru;

• Estyn gwahoddiad i artistiaid a rhwydweithiau rhyngwladol i Gymru

• Sefydlu Cymru fel cystadleuydd tra chymwys yn y dirwedd ddiwylliannol ryngwladol.

Mae Rhaglen Gyfnewid Fyd-eang y Dyn Gwyrdd wedi bod yn allweddol wrth ddyrchafu creadigrwydd a diwylliant Cymru ar lwyfan y byd. Mae'r rhaglen wedi sefydlu cysylltiadau fel bod gwaith o Gymru yn teithio mewn gwledydd gan gynnwys Iwerddon, yr Alban, Lloegr, Sbaen, Ffrainc ac Awstralia.

Mae'r rhaglen yn croesawu sefydliadau ac ymarferwyr celfyddydol rhyngwladol i Gymru, gan ganolbwyntio ar yr UE a rhanbarthau sy'n rhannu treftadaeth ieithyddol frodorol Cymru. Datblygwyd partneriaethau cryf gyda chyrff diwylliannol yn Iwerddon, yr Alban, Gwlad y Basg, Catalwnia, ac yn fwy diweddar yn Fflandrys a Llydaw; gan gysylltu rhwydweithiau cenedlaethol a rhyngwladol fel Articulture, Outdoor Arts UK, Four Nations, ISACS, Surge, +Culture, FiraTàrrega, Catalan Arts, Circostrada, Zomer Van Antwerp, Circuscentrum ymhlith eraill

Bwrsariaeth Celfyddydau Awyr Agored y Pedair Gwlad

Dyddiad cau ar gyfer ceisiadau: Hanner nos, dydd Sul, 1 Chwefror 2026

Mae Prosiect Bwrsariaeth y Pedair Gwlad yn cynnig bwrsariaethau ar gyfer gwaith awyr agored newydd i artistiaid a chwmnïau sy'n dod i'r amlwg sy’n ymddiddori mewn celfyddydau awyr agored. Bydd bwrsariaethau’n cael eu dyfarnu i ymgeiswyr o Gymru, Lloegr, yr Alban ac Iwerddon. Bydd y prosiect yn caniatáu i artistiaid sydd ar ddechrau eu gyrfa gael eu mentora trwy greu gweithiau celf awyr agored newydd, a fydd yn cael teithio i wyliau ym mhob un o'r pedair gwlad yn ystod haf 2026:

Dyn Gwyrdd (Cymru, mewn partneriaeth ag Ymddiriedolaeth y Dyn Gwyrdd)

Gŵyl Surge(Glasgow, mewn partneriaeth ag Articulation),

Gŵyl BD (Bradford, mewn partneriaeth â Bradford Producing Hub) – yn ddibynnol ar gyllid

Gŵyl Spraoi (Waterford, Iwerddon mewn partneriaeth ag ISACS)

Bydd yr artistiaid/cwmnïau a ddewisir yn derbyn cyllideb o £5000/€5500 ar gyfer creu'r gwaith a £150/€170 y dydd y pen ar gyfer diwrnodau perfformio, mentora proffesiynol gan y gwyliau a phob un o'r rhwydweithiau partneriaeth, yn ogystal â chwrs preswyl tri diwrnod yn Aberhonddu, Cymru ym mis Mawrth 2026. Darperir cludiant, llety a lwfans dyddiol (neu gyfwerth) ar gyfer y cwrs preswyl a’r daith berfformio.

Gofynion:

• Cyflwyno syniad ar gyfer gwaith celf awyr agored newydd ar raddfa fach, statig neu grwydrol.

• Mae angen i'r gwaith fod ar gyfer unigolyn neu ddau artist teithiol (rhaid i bob artist gael ei gadarnhau gan yr ymgeisydd cyn gwneud cais);

• Mae angen i'r gwaith fod o faint sy'n hwylus ei gludo.

• Mae angen i'r gwaith fod yn addas ar gyfer ei berfformio neu ei arddangos mewn mannau trefol ac mewn caeau gwyrdd.

• Mae angen i'r artistiaid fod ar gael i fynychu’r cwrs preswyl yn Aberhonddu rhwng 8 ac 11 Mawrth 2026

• Rhaid i’r artistiaid hefyd fod ar gael ar gyfer nifer penodol o ddyddiadau mentora yn ystod yr wythnos rhwng mis Mawrth a mis Gorffennaf 2026 (yr union ddyddiadau i'w cytuno)

• A bod ar gael ar ddyddiadau'r pedair gŵyl:

  • 23 – 24 Gorffennaf 2026 (Gŵyl BD, mewn partneriaeth â Bradford Producing Hub England i'w gadarnhau)

  • 25 – 26 Gorffennaf 2026 (Gŵyl Surge, Yr Alban)

  • 31 Gorffennaf- 2 Awst (Gŵyl Spraoi, Iwerddon)

  • 19 – 23 Awst 2026 (Gŵyl y Dyn Gwyrdd, Cymru)

Byddwn yn cynnig:

• Cwrs preswyl strwythuredig yn Aberhonddu ynghyd â mentora proffesiynol gan y Dyn Gwyrdd, BD, Surge a Spraoi ym meysydd creu, cynhyrchu, marchnata a gwneud ffilmiau ‘guerrilla’:

• Bwrsariaeth o £5000/€5500

• Teithio, llety, lwfans dyddiol, a ffi o £150/€170 y dydd fesul artist/ fesul diwrnod perfformio ym mhob gŵyl

• Gofod ymarfer a chreu lle bo'n bosibl
  

Mae Prosiect Bwrsariaeth Pedair Gwlad yn gwerthfawrogi amrywiaeth ac yn hyrwyddo cydraddoldeb a chynhwysiant. Rydym yn annog ac yn croesawu ceisiadau gan bobl o bob cefndir a gallu.

Sylwer bod maint a chyrhaeddiad y prosiect hwn yn dibynnu ar ganlyniadau cyllido penodol.

Er mwyn gwneud cais:

E-bostiwch eich cynnig (uchafswm o 500 gair) ac un bio byr ar gyfer pob perfformiwr/cydweithiwr (uchafswm o 100 gair yr un), mewn un ddogfen.

Os ydych yn byw yng Nghymru, cysylltwch â Zoe Munn o’r Dyn Gwyrdd zoe@greenman.net

Os ydych yn byw yn Lloegr, cysylltwch â BPH hello@bdproducinghub.co.uk

Os ydych yn byw yn yr Alban, cysylltwch ag Alan Richardson o alan@surge.scot

Os ydych yn byw yn Iwerddon, cysylltwch â Gŵyl Spraoi nest@spraoi.com

Y dyddiad cau ar gyfer ceisiadau yw hanner nos, ddydd Sul, 1 Chwefror 2026.

Bydd penderfyniadau'n cael eu gwneud erbyn dydd Llun, 9 Chwefror 2026.